Barbón destaca'l "rigor xurídicu" y la "reflexón sele" del Conseyu Consultivu

El presidente del Principáu envalora a la presidenta saliente'l so "bon desempeñu"

El presidente del Principáu, Adrián Barbón, sorrayó esti xueves la importancia “suprema" del Conseyu Consultivu de la comunidá, que trabaya "siempres dende'l rigor xurídicu y con reflexón sele" nun contestu nel que la conversación pública aburúyase pol ruíu".

El xefe del Executivu pronuncióse nestos términos na toma de posesión d'Elena Díaz, María Yovana Menéndez, Jesús Iglesias, Pablo Baquero y Iván de Santiago como vocales d'esti órganu cimeru de consulta, a la que fueron el presidente del parlamentu, Juan Cofiño, y el del Tribunal Cimeru de Xusticia d'Asturies, Jesús María Chamorro, y la fiscal cimera, María Eugenia Prendes.

Estos representantes van ser los encargaos de decidir quién va desempeñar la presidencia nesti nuevu mandatu y la persona escoyida va tomar posesión nun actu previstu mañana na sede del organismu en Xixón.

Barbón envaloró a la presidenta saliente, Begoña Sesma, el so "bon desempeñu" nos postreros seis años al frente del máximu órganu d'asesoramientu del Principáu, que dende la so puesta en marcha, va dos décades, funcionó con “vocación discreta y con protagonismu xustu" y espresóse al traviés de dictámenes de "concienzuda talla xurídica".